Шығыста 717 мың адам тұрады. Алайда, жыл басынан бері өңір халқы 2 016 адамға азайған. Бұдан бөлек, жұмыссыздық деңгейі 4,6 пайызға жеткен. Бұл туралы Өңірлік коммуникациялар қызметі алаңында өткен баспасөз мәслихатында ҚР Стратегиялық жоспарлау және реформалар агенттігі Ұлттық статистика бюросының ШҚО бойынша департаментінің басшысы Ерназ Нұрланов мәлімдеді.
2026 жылғы 1 маусымдағы мәліметке сәйкес, облыс тұрғындарының 485,9 мыңы қалада, 231,1 мыңы ауылдық жерде тұрады. Жыл басынан бері қала халқының үлесі 0,1 пайызға, ауыл тұрғындарының үлесі 0,6 процентке төмендеген.
Өңірдегі демографиялық ахуалда әйелдер саны басым. Қазір облыста 373,1 мың әйел тұрады. Бұл жалпы халықтың 52 пайызы. Ерлер саны 343,9 мың адамды немесе 48 пайызды құрайды.
Бірінші тоқсанның қорытындысы бойынша облыста 17 483 адам жұмыссыз ретінде тіркелген. Жұмыссыздық деңгейі 4,6 пайыз деңгейінде қалып отыр.
Кәсіпкерлік саласында оң өзгеріс бар. 2026 жылғы 1 шілдедегі жағдай бойынша өңірде 14 859 заңды тұлға тіркелген. Бұл өткен жылдың сәйкес кезеңімен салыстырғанда 0,2 пайызға көп. Оның 12 241-і немесе 82,4 пайызы белсенді қызметін жалғастырып келеді.
Шағын кәсіпкерлік өңір экономикасының негізгі бағыттарының бірі. Қазіргі таңда облыста 11 953 шағын кәсіпорын тіркелген. Бұл барлық заңды тұлғалардың 80,4 пайызы. Өткен жылдың осы кезеңімен салыстырғанда олардың саны 0,3 пайызға артқан.