Алматыда Қазақстан Республикасы Қорғаныс министрлігінің Радиоэлектроника және байланыс әскери-инженерлік институтына құжат қабылдау басталды. Бұл – радиоэлектроника, байланыс, ақпараттық қауіпсіздік және автоматтандырылған басқару жүйелері саласында офицерлер даярлайтын еліміздегі жалғыз әскери жоғары оқу орны. Жаңа оқу жылында институт 280-нен астам курсант қабылдауды жоспарлап отыр. Құжаттар 31 шілдеге дейін қабылданады.
Талапкерлер бірнеше кезеңнен тұратын конкурстық іріктеуден өтеді. Оның ішінде ҰБТ нәтижелері, психологиялық тестілеу, медициналық тексеру, дене дайындығын бағалау және арнайы тексеру бар.
Конкурсқа қатысу үшін ҰБТ-ның төрт пәнінен кемінде 50 балл жинап, іріктеудің барлық кезеңінен сәтті өту қажет. Тестіден жақсы нәтиже көрсету ғана жеткіліксіз: болашақ офицердің денсаулығы мықты, дене дайындығы жоғары әрі психологиялық тұрғыдан төзімді болуы керек.
Институт жоғары технологияларға негізделген төрт мамандық бойынша офицерлер даярлайды: «Әскери істегі радиоэлектроника және инжиниринг», «Әскери істегі радиотехника және инжиниринг», «Әскери істегі автоматтандыру және инфокоммуникациялық технологиялар» және «Ақпараттық қауіпсіздік жүйелері». Бұл бағыттар әскерді басқарудың цифрлық жүйелерін, қорғалған байланыс арналарын және киберқауіпсіздікті дамытуға негіз болады. Өйткені қазіргі армия әлдеқашан тек техника мен жеке құрамға ғана тәуелді емес. Сенімді байланыс пен ақпаратты қорғау жүйесі болмаса, ең қымбат техниканың өзі тез арада металл сынығына айналуы мүмкін.
Институт қос дипломдық білім беру бағдарламаларына да қабылдауды жалғастырып жатыр. «Әскери журналистика» мамандығы әл-Фараби атындағы Қазақ ұлттық университетімен, ал «Әскери дирижер» бағдарламасы Құрманғазы атындағы Қазақ ұлттық консерваториясымен бірлесіп жүзеге асырылады. Бұл бағыттарға түсетін талапкерлер шығармашылық емтихан тапсырады.
Оқу шығындарын мемлекет толық өтейді. Курсанттар тегін жатақханамен, тамақпен, медициналық қызметпен және киім-кешекпен қамтамасыз етіледі.
Институтты аяқтаған түлектерге алғашқы офицерлік «лейтенант» әскери атағы беріледі. Оқуды үздік бітіргендер «аға лейтенант» атағын алады. Барлық жас офицерге Қазақстанның Қарулы күштері мен басқа да әскери құрылымдарында қызметке орналасуға кепілдік беріледі.
2026 жылы Радиоэлектроника және байланыс әскери-инженерлік институты 25 жылдығын атап өтеді. Ширек ғасыр ішінде жоғары оқу орны төрт жылдық даярлау жүйесіне көшіп, оқу-материалдық базасын жаңғыртты, қос дипломдық білім беру бағдарламаларын енгізді және қорғаныс саласының жоғары технологиялық бағыттарына маман даярлайтын негізгі оқу орындарының біріне айналды.
