Алматы облысында ұшуларды іздестіру-құтқару тұрғысынан қамтамасыз ету бойынша ауқымды тактикалық-арнайы оқу-жаттығу өтті. Қазақстанның авиациялық әкімшілігі мен еліміздің Төтенше жағдайлар министрлігі авиациялық оқиға кезінде шұғыл қызметтердің қалай әрекет ететінін тексерді.
Мамандар іздестіру-құтқару және психологиялық жұмыстарды ұйымдастыруды пысықтады. Оқу-жаттығуға Қазақстанның ТЖМ күштері, Іздестіру және құтқаруды үйлестіру орталығы, ТЖМ мен ҚР ҰҚК авиациясы, сондай-ақ жерүсті бөлімшелері қатысты.
Жаттығуға Алматы және Шымкент қалаларының, Алматы және Жетісу облыстарының төтенше жағдайлар департаменттерінің күштері мен құралдары жұмылдырылды. Сонымен қатар «Барыс» республикалық құтқару қызметінің, Апаттар медицинасы орталығының және басқа да қызметтердің мамандары қатысты. Оқу-жаттығуды Қырғыз Республикасының өкілдері бақылады.
Жаттығу сценарийі бойынша Іле өзенінің маңында бортында адамдары бар Boeing 727 жолаушылар ұшағы мәжбүрлі түрде қатты қонды. Оқу-жаттығу дабылы түскеннен кейін шұғыл қызметтер дайындық режиміне көшірілді.
Шартты оқиға орнына ТЖМ-нің «Қазавиақұтқару» және ҚР ҰҚК әуе кемелері жіберілді. Олардың бортында құтқарушылар топтары мен медицина қызметкерлері болды.
Ұшақтың координаттарын КОСПАС-САРСАТ халықаралық жүйесі анықтады. Бұл жүйе апат белгісі мен әуе кемесінің орналасқан жері туралы мәліметті автоматты түрде жібереді. Соның арқасында шартты оқиға туралы ақпаратты әлемнің түкпір-түкпіріндегі құтқару қызметтері алды.
Құтқарушылар шартты апат орнын анықтап, аумақты барлады және адамдарды іздеуге кірісті. Зардап шеккендер эвакуацияланып, оларға алғашқы медициналық көмек көрсетілді. Кейін олар әуе көлігімен медициналық мекемелерге жеткізілді.
Оқу-жаттығуға қатысушылар апат белгісін қабылдаудан бастап зардап шеккендерді эвакуациялауға дейінгі әрекеттердің барлық кезеңінен өтті. Мамандар белгіленген алгоритмдер бойынша жұмыс істеп, авиацияның, жерүсті бөлімшелерінің, медицина қызметкерлері мен іздестіру-құтқару қызметтерінің өзара іс-қимылын тексерді.
Оқу-жаттығу қорытындысы бойынша Қазақстанның ТЖМ авиациялық оқиғаларға байланысты төтенше жағдайларға жедел ден қою үшін күштер мен құралдардың дайын екенін растады. Тексеру жұмылдырылған барлық қызмет арасындағы өзара іс-қимылдың жоғары деңгейде екенін де көрсетті.
