Қазақстанның Энергетика министрлігінде Әділетті энергетикалық көшу жөніндегі әріптестікті (JETP) одан әрі дамыту мәселелері талқыланды. Энергетика вице-министрі Бақытжан Ильяс Еуропалық қайта құру және даму банкінің өкілдерімен кездесті. Тараптар JETP жобаларының портфелін қалыптастыру, халықаралық серіктестермен ынтымақтастық орнату және Қазақстандағы бастаманың институционалдық негізін нығайту мәселелерін қарастырды.
Кездесуге ЕҚДБ-ның климаттық стратегия және оны іске асыру департаментінің директоры, Sustainable Infrastructure Group бизнес-бағытының жетекшісі Фелисити Спорс, ЕҚДБ-ның Қазақстан бойынша басшысының орынбасары әрі Еуразиядағы энергетика бағытының өңірлік жетекшісі Ерлан Рамазанов қатысты.
Сондай-ақ талқылауға климаттық стратегия және оны іске асыру департаменті директорының орынбасары, энергетикалық көшу жөніндегі бөлімше басшысы Кристиан Карраретто, өңірлік саясат және стратегия жөніндегі жетекші сарапшы Майра Карасаева, өңірлік саясат және стратегия жөніндегі талдаушы Айгерім Салықбай, энергетикалық ресурстар департаментінің банкирі Ильяс Ахетов және аудармашы Александра Нигай қосылды.
Бақытжан Ильяс Қазақстанның JETP-ті ұлттық климаттық мақсаттарға қол жеткізудің, инвестиция тартудың және заманауи технологияларды енгізудің маңызды құралы ретінде қарастыратынын атап өтті. Сонымен қатар билік энергетика секторының тұрақты дамуын сақтауды көздеп отыр.
Тараптар әріптестікті институционалдық тұрғыдан бекіту мәселесіне жеке тоқталды. Энергетика министрлігі платформаның негізгі қағидалары мен жұмыс тетіктерін нормативтік құқықтық актілерде бекітуді ұсынады. Бұл қатысушылар арасындағы өзара іс-қимылдың ашық ережелерін айқындап, бастаманы жүзеге асыруға берік негіз қалыптастыруы тиіс.
Энергетика министрлігі ЕҚДБ-ның JETP-тің институционалдық негізін дамытуға көмектесуге дайын екенін де құптады. Қазақстан тарапы нормативтік және ұйымдастырушылық тетіктерді әзірлеу кезінде банктің сараптамалық қолдауына мүдделі.
Кездесу қорытындысы бойынша тараптар бірлескен жұмысты жалғастыруға дайын екенін растады және Қазақстандағы Әділетті энергетикалық көшу жөніндегі әріптестікті одан әрі дамытуға келісті.