Азаматтарды қабылдау: ШҚО әкімі тұрғындар көтерген мәселелер бойынша нақты тапсырмалар берді

Шығыс Қазақстан облысының әкімі Нұрымбет Сақтағанов салалық басқармалар мен қала, аудан әкімдіктері өкілдерінің қатысуымен азаматтарды жеке сауалдары бойынша қабылдады. Соның барысында тұрғындар баспана, дәрі-дәрмекпен қамтамасыз ету және көмір жеткізу сынды мәселелерді көтерді.
Өскемен қаласының тұрғыны Елена Белова Абай даңғылында орналасқан, 1947 жылы салынған апатты тұрғын үйді реновациялау мәселесін қозғады. Оның айтуынша, жобаны іске асыру мерзімі 2026 жылға шегерілгенімен, тұрғындарға қоныс аудару жұмыстарының қашан басталатыны және жаңа баспананың қандай тәртіппен берілетіні жөнінде нақты ақпарат берілмеген. Осыған байланысты Нұрымбет Сақтағанов жобаның бірінші кезеңін жеделдетіп іске асыруды және екінші кезеңді қаржыландыру жайын пысықтауды тапсырды.
Қабылдауға келген тағы бір тұрғын жүйелі склероз диагнозы қойылған баласын «Селлсепт» препаратымен қамтамасыз етуді сұрады. Облыс әкімі жауапты басқармаларға тегін дәрі-дәрмекпен қамтамасыз ету аясында емдеудің мүмкіндіктерін қарастыру, отбасының әлеуметтік жағдайын бағалау және қолданыстағы мемлекеттік қолдау шараларын түсіндіру міндетін қойды.
Ал «ALTAI CARGO» компаниясының өкілі Катонқарағай ауылындағы қазандықтарға көмір тасымалдағаны үшін «АлтайКомХозСервис» КМК тарапынан берешек өтелмей отырғанын жеткізді. Сот шешімі шыққанына қарамастан, кәсіпорын алдындағы 38 миллион теңгеден астам қарыз әлі күнге дейін төленбеген. Кәсіпкердің айтуынша, бұл жағдай компания қызметінің тұрақтылығына қауіп төндіруі мүмкін.
Нұрымбет Сақтағанов Катонқарағай ауданының әкіміне және облыстық экономика және бюджеттік жоспарлау басқармасына аталған қаржылық міндеттемелерді қысқа мерзім ішінде шешуді тапсырды.