Шығыс Қазақстан облысында жалпыұлттық «Таза Қазақстан» экологиялық бастамасы аясында «Үлгілі ауыл» өңірлік байқауы бастау алды.
Жобаның мақсаты – елді мекендерді дамыту, аумақтарды абаттандыру, қоршаған ортаны қорғау және тұрғындардың азаматтық белсенділігін арттыру. Байқауға Шығыс Қазақстандағы барлық ауыл қатыса алады. Ол үшін ауылдың жетістіктері мен жүзеге асырылған бастамалары таныстырылатын бейне-өтінім дайындалып, тиісті аудан әкімдігіне ұсынылуы қажет.
Аудандық кезеңнің қорытындысы бойынша үздік жұмыстар облыстық кезеңге жолданады. Оларды ШҚО Табиғи ресурстар және табиғат пайдалануды реттеу басқармасы жанындағы конкурстық комиссия қарайды.
Бейне-өтінімдерді қабылдау 2026 жылғы 17 шілдеге дейін жалғасады. Облыстық комиссия ұсынылған материалдарды саралай келе, өңірдегі ең үздік ауылды анықтап, жеңімпазға «Үздік ауыл» атағын береді.
Ұйымдастырушылардың айтуынша, байқау тек ең көрікті әрі абаттандырылған ауылдарды анықтауды ғана емес, сондай-ақ ауыл тұрғындарын экологиялық жобаларды жүзеге асыруға, қоғамдық бастамаларды дамытуға және ауылдағы өмір сапасын жақсартуға ынталандыруды көздейді.