Облыс орталығында 6 шілде күні славян халқының дәстүрлі Иван Купала мерекесі атап өтіледі.
Қала тұрғындары мен қонақтары халық билеріне қатысып, ұлттық ойындар ойнап, басқа да қызықты шараларға қатыса алады. Ұйымдастырушы – Достық үйі-Қоғамдық келісім орталығы.
Мереке аясында концерттік бағдарлама ұсынылып, түрлі квесттер ұйымдастырылады және халық қолөнері жәрмеңкесі өтеді.
Дәстүр бойынша Купала түні қыз-келіншектер гүл шоқтарынан гүлтәж өріп, оны суға жібереді. Осыған байланысты ұйымдастырушылар қатысушыларға гүлтәждерін өздерімен бірге ала келуге кеңес берді.
Мерекенің басты дәстүрлерінің бірі – алаудың үстінен секіру. Кештің шарықтау шегі ретінде салтанатты түрде алау жағылады.
Мерекелік шара 6 шілде күні Металлургтер саябағында өтеді. Басталуы – сағат 18:00-де.