Патрульдік полиция қызметкерлері Глубокое кентін патрульдеу барысында «Racer RC 250» маркалы мотоциклді тоқтаттқан. Құжаттарды тексеру кезінде 35 жастағы ер адамның 2022 жылдың қазан айында Глубокое аудандық сотының шешімімен 10 жыл мерзімге көлік құралын басқару құқығынан айырылғаны белгілі болды.
— Алайда ол сот шешімін елемей, қайтадан рөлге отырған. Медициналық куәландыру жүргізушінің ауыр дәрежедегі мас күйде екенін көрсетті. Қазіргі уақытта мотоцикл арнайы айып тұрағына қойылды. Ал жүргізуші уақытша ұстау изоляторына қамалды, — делінген ақпаратта.
Осы ретте, Шығыс Қазақстан облысы Полиция департаменті азаматтарға көлік жүргізу құқығынан айырылғандардың мас күйде қайтадан рөлге отыруы қылмыстық жауапкершілікке әкеліп соғатынын ескертті. Заң талаптарын қатаң сақтап, жол қозғалысына қатысушылардың өмірі мен денсаулығына қауіп төндірмеуге шақырамыз.