3 маусым күні Өскемен қаласындағы Путевая көшесінде қоқыс, ескі резеңке шиналар мен терек мамығы өртенді.
Өрт сөндірушілердің жедел әрекетінің арқасында тілсіз жаудың кең аумаққа таралуына жол берілмеді. Тілсіз жау дер кезінде оқшауланып, толықтай сөндірілді.
Осы ретте, Шығыс Қазақстан облысы Төтенше жағдайлар департаменті өңір тұрғындарына өрт қаупі жоғары кезеңде қауіпсіздік талаптарын қатаң сақтаудың маңыздылығын еске салды. Құтқарушылар терек мамығын, құрғақ шөп пен қоқысты өртемеуге шақырады.
Мамандардың айтуынша, ыстық әрі желді ауа райында өрт өте жылдам таралып, тұрғын үйлерге, шаруашылық қора-жайларға және жасыл желекке қауіп төндіреді.