Облыстық филармония залында басталған айтыста Шығыс Қазақстан және Қарағанды өңірлерінің ақындары мен дәстүрлі өнерпаздары қатысуда. Ашылу салтанатында сөз алған аймақ басшысы Нұрымбет Сақтағанов айтыс — ұлттың жаны, төл өнердің ұлы көші екенін жеткізді.
— Айтыс десе көз алдымызда қазыналы қазақ халқының ұлттық болмысы, салт-санасы, сан ғасырлық мәдениеті елестейді. Былтыр ашылған Ақтан Нұрбаев атындағы облыстық ақындар мектебі өнерге ынтасы бар талай жастың қанатын қатайтып, талабын шындап, топқа қосып келеді. Жыл сайын Шығыста республикалық, халықаралық екі айтысты дәстүрлі түрде өткізіп отыруды жолға қойдық, — деді облыс әкімі.
Қатысушыларға сәттілік тілеген Нұрымбет Сақтағанов айтысты тамашалауға келген қалың елмен бірге орындыққа жайғасты.
Командада 10 адамнан қатысып жатыр. Олар айтысып қана қоймай, терме, жыр және халық әндерін орындап, күмбірлетіп күй де шертеді.
Бұл ерекше форматтағы жоба 2024 жылдан бері «AMANAT» партиясының бастамасымен жүзеге асып келеді. Жобаның авторы — ҚР Парламенті Мәжілісінің депутаты Аманжол Әлтай. Жобаның барлық кезеңіне төрелік етіп келе жатқан — айтыс өнерінің абызы, Қазақстанның еңбек сіңірген қайраткері Жүрсін Ерман.