Кеңсай ауылдық округінің тұрғыны Толқын Мұратбай Мемлекет басшысы Қасым-Жомарт Тоқаевтың бастамасымен қолға алынған «Таза Қазақстан» жалпыұлттық экологиялық акциясына өз үлесін қосу үшін ерекше белсенділік танытты.
10 наурыз күні ерікті Зайсан ауданындағы елді мекен жолдарын қоқыстан тазартты. Сондай-ақ ол бұл игі шараны Жаңа Конституцияны қолдау аясында қолға алып отыр.
«Бұл бастама тек Зайсан өңірімен шектеліп қалмайды. Алдағы уақытта ерікті азамат еліміздің басқа да аймақтарына барып, экологиялық тазалық жұмыстарын жалғастырмақ», — деп хабарлады аудан әкімдігінен.
Осы сапарда оны Кеңсай ауылының тұрғыны Сетерхан Қабдешқызы қолдап, көмек көрсеткен. Сонымен қатар Зайсан қаласының тұрғыны Бекбақыт Әділбек өзінің жеке «ВАЗ» автокөлігімен қосылып, тасымалдау жұмыстарына қолұшын созды.
Бүгін мәдениет үйінің өнерпаздары ауданның тазалығы үшін білек сыбана іске кіріскен азаматтарды салтанатты түрде шығарып салды. Өнер иелері еріктілерге әуелетіп ән шырқап, сәттілік тіледі.