Өскемен қаласында тұрғындардың шағымынан кейін бірнеше көпқабатты үйдің шатырына жөндеу жұмыстарын жүргізу жоспарланып отыр.
Әңгіме Назарбаев даңғылындағы 54, 64 және 66 үйлерге қатысты болып отыр. Қала тұрғындарының айтуынша, аталған үйлердің шатырлары ұзақ уақыттан бері апатты жағдайда тұр. Олар көктем мезгілінің келуімен пәтерлерге су кіру қаупі қайта туындай ма деп алаңдайды.
Халықпен кездесуден кейін қала әкімі Алмат Ақышов көрсетілген мекенжайларға арнайы барып, жағдаймен жеке танысты.
— Тұрғындармен бірлесіп Назарбаев көшесіндегі 54, 64, 66 үйлердің шатырын жөндеу және Гоголь көшесі, 36 мекенжайындағы үйдің қасбетін жөндеу мен аула аумағын абаттандыру мәселелерін қарадық. Жауапты мамандарға техникалық тексеріс жүргізіп, жобалық-сметалық құжаттаманы әзірлеу және қосымша сараптамалар ұйымдастыру тапсырылды, — деді шаһар басшысы.
Қала әкімдігі өкілдерінің мәліметінше, азаматтардың өтініштеріне байланысты жұмыс жалғасады. Осы аптада облыс орталығында әкімнің халықпен кезекті кездесуі өтеді. Бұл жолы ЖКМ ықшамауданы мен оған іргелес аумақтардың тұрғындарымен жүздесу жоспарланған.