Облыстық төтенше жағдайлар департаменті баспасөз қызметінің мәліметіне сүйенсек, «Өскемен-Рахман қайнары» тасжолында қар көшкінінің алдын алу шаралары жүргізілді.
— Бұл жол өңірдегі ең қозғалысы қарқынды әрі жер бедері күрделі бағыттардың бірі. Осыған байланысты тау бөктерінде 7 жарылыс жасалды. Жалпы көлемі 1885 текше метр қар түсіріліп, өздігінен көшкін жүру қаупі айтарлықтай төмендетілді, — делінген ақпаратта.
Шығыс Қазақстан — республикадағы қар көшкіні қаупі жоғары өңірлердің бірі. Облыстық «Қазселденқорғау» мекемесі облыстық филиалының дерегінше облыс бойынша 497 учаскеде қар көшкіні жүруі мүмкін. Онда 93 шақырым көлік жолы орналасқан.