Өскеменде үнемі ұзын-сонар кептеліс болатын Ертіс көпірінен түсетін жолайрығында айналмалы қозғалысты іске қосу жоспарланып отыр.
Бұл екі деңгейлі жолайрығын салу жобасының алғашқы кезеңі. Құрылыс жұмыстарын жалғастыру үшін қозғалыс уақытша айналма жол арқылы ұйымдастырылмақ. Жаңа қозғалыс Сәтбаев даңғылын Базовая көшесімен, Жібек жолы көшесімен және Есенберлин даңғылымен байланыстырады.
Айналма жол — уақытша ғана енгізіледі. Себебі солай ғана құрылысшылар қиылыстың ішкі бөлігіне кіріп, болашақ жол өткелінің тіректерін орната алады. Барлығы 15 тірек салу жоспарланған.
Шығыс Қазақстан облысы Полиция департаменті айналмалы қозғалыс енгізілгеннен кейінгі жол жүру тәртібін түсіндірді.
— Айналма жолға кез келген жолақтан кіруге рұқсат етіледі. Ал шығу кезінде жүргізуші жол белгілеріне сәйкес тиісті жолақты таңдауы тиіс. Кіру және шығу барысында оң жақ бұрылыс шамын қосу қажет, ал қайта жолақ ауыстырғанда оң жақтан келе жатқан көлікке жол беру міндетті, — деп хабарлады департаменттің баспасөз қызметінен.
Айналмалы қозғалысты іске қосуға дайындық бірнеше күннен бері жүріп жатыр. Жол бойына қозғалыс бағыттарын көрсететін белгілер мен «Айналмалы қозғалыс» жол белгісі орнатылып, бағдаршамдар қойылуда.
Енді бұрынғыдай қиылыстан тікелей өту мүмкіндігі жабылады. Айналмалы қозғалыстың нақты қашан іске қосылатыны әзірге нақтыланбағанымен, өзгерістер жақын күндері енгізіледі деп күтілуде.