ШҚО Төтенше жағдайлар департаменті баспасөз қызметінің мәліметіне сүйенсек, Зайсан қаласындағы 58 жастағы ер адамға шұғыл медициналық көмек қажет болған.
— ТЖМ «Қазавиақұтқару» әуе бөлімшесінің ұшқыштары Сергей Пинигин мен Бауыржан Бөтенбаев, санавиация дәрігерлері Лариса Величко мен Айгүл Күдербаева отырған «Ми-8» тікұшағы сол жерге келіп жетті. Олар науқасты Зайсаннан Өскемен қаласына шұғыл жеткізді. Себебі ер адамға мамандандырылған медициналық көмек қажет болған. Ал оны тек облыс орталығындағы дәрігерлер көрсете алады, — делінген ақпаратта.
Экипаждың жоғары кәсібилігі мен медицина қызметкерлерінің үйлесімді іс-әрекетінің нәтижесінде әуе тасымалы сәтті жүргізілді. Өскеменге жеткізілгеннен кейін пациент медициналық мекеме дәрігерлеріне тапсырылды.
Айта кетейік, ҚР ТЖМ санавиациясының әуе рейстері қашықтықты қысқартып, дер кезінде медициналық көмек көрсетуге және талай адамның өмірін сақтап қалуға мүмкіндік беріп келеді.