Катонқарағайда қар барысы фототұзаққа түсіп қалды

Бұл туралы Катонқарағай мемлекеттік ұлттық табиғи паркі өкілдері хабарлады. Аршаты орманшылығы аумағында орналасқан фототұзақты орманшы Жомарт Аманбаев орнатқан.
— Осы фототұзаққа бұған дейін де қар барысы кадрға іліккен. Енді тағы бір мәрте түсіп отыр. Қар барысы — Алтайдың асқақ таулары мен тұмса табиғатында мекендейтін, Қазақстанның Қызыл кітабына енген сирек жыртқыш. Оның фототұзаққа жиі түсуі — ұлттық парк аумағында табиғи тепе-теңдіктің сақталып, жануарлар дүниесінің қауіпсіздігін бақылау жұмыстарының нәтижелі жүргізіліп жатқанын көрсетеді. Мұндай бір сәтті кадр — орманшылардың тынымсыз еңбегі мен табиғатты қорғауға деген жанашыр көзқарасының айқын дәлелі, — делінген ақпаратта.
Ұлттық парк қызметкерлері фототұзақтар арқылы жабайы жануарларды бақылау жұмыстарын ары қарай да жалғастырады.