27 жастағы қала тұрғыны полиция хабарласқан. Өз сөзінде ол бұрын бірге тұрған жігіті ірі көлемде несие алғызып, қайтармай жүргенін жеткізді.
— Белгілі болғандай, ер адам әуелі түрлі сылтаулармен бірнеше рет ақша сұрап, белгіленген мерзімде қайтаратынын уәде еткен. Алайда қайтарғанның орнына тағы да қарыз сұрай берді. Жәбірленуші сол үшін өз атына бірнеше банктен несие рәсімдеген. Осының салдарынан оған келтірілген жалпы шығын мөлшері 10 млн теңгені құрады, — делінген ШҚО Полиция департаменті таратқан ақпаратта.
Қазіргі таңда алаяқтық фактісі бойынша қылмыстық іс қозғалды. Күдіктінің бұған дейін де осыған ұқсас қылмыс жасағаны үшін сотталғаны анықталды.
Осы ретте, полицейлер азаматтарға өз қаражатынызды басқаға берген кезде аса сақ болу қажеттігін ескертеді. Тіпті бұл өтінішті жақын адамдарыңыз немесе таныстарыңыз жасаса да. Егер күдікті әрекеттерге тап болсаңыз немесе алаяқтықтың арбауына түссеңіз, дереу құқық қорғау органдарына хабарласыңыз.