Шығыс Қазақстан облысы Катонқарағай ауданына қарасты Өрел ауылы «Ауыл» телеарнасы ұйымдастырған республикалық «Үздік ауыл» жобасына қатысуда. Енді ауылдастардың, аудан тұрғындары мен барша шығысқазақстандықтардың қолдауы Өрелдің келесі кезеңге өтуіне ықпал етпек.
Жоба ауылдардың әлеуетін танытып, олардың жетістіктерін көпшілікке көрсетуге мүмкіндік береді. Дауыс беру екі кезең бойынша өтеді. Бірінші кезең 2026 жылғы 12-18 қазан аралығында Instagram желісіндегі @auyltv.kz парақшасында ұйымдастырылады. Екінші кезең 19-25 қазан күндері YouTube желісіндегі @auyltvkz арнасы арқылы өтеді. Ал жобаның финалы 31 қазанға жоспарланған.
Байқау ережесіне сәйкес, финалға өтетін екі ауылдың нәтижесі қаралым, лүпіл және пікір саны негізінде қалыптасатын ұпайлар арқылы анықталады. Сондықтан Өрел туралы жарияланған сюжетті көріп, оған қолдау білдіру және материалды кеңінен тарату — ауылдың мүмкіндігін арттырудың маңызды жолы.
Осыған орай облыс тұрғындарын Өрел ауылы туралы сюжетті әлеуметтік желілерде бөлісуге, ортақ чаттарға таратуға және дауыс беруге белсенді қатысуға шақырамыз. Өрел — Шығыс Қазақстан ауылдарының әлеуетін танытуға мүмкіндік алған елді мекендердің бірі. Бұл жоба ауылдың жетістіктерін кеңінен насихаттап қана қоймай, туған жерге деген жанашырлық пен өңірлік бірлікті нығайтуға да ықпал етеді.