Өскемен қаласында жылыту маусымының нақты қашан басталатыны әзірге белгісіз. «Шығыс Жылу» АҚ мәліметінше, дәстүр бойынша жылу ауа температурасының тәуліктік орташа көрсеткіші бірнеше күн қатарынан 10 градустан төмен болған кезде беріле бастайды.
Өткен жылы шаһарда жылыту маусымы 1 қазанда басталған. Бірнеше күн бұрын Энергетика министрі Ерлан Ақкенженов ел шығысында жылыту маусымы 1 қазанға дейін басталатынын айтқан болатын.
Шешім қабылданғаннан кейін жылу беру кезең-кезеңімен жүзеге асырылады. Алдымен әлеуметтік нысандар — ауруханалар, балабақшалар мен мектептер жылуға қосылады. Ал тұрғын үйлер бекітілген кестеге сәйкес біртіндеп жылыту жүйесіне қосылады.
«Шығыс Жылу» компаниясының хабарлауынша, жылыту маусымының нақты басталу күні әзірге белгіленген жоқ.
Синоптиктердің болжамынша, алдағы демалыс күндері Өскеменде ауа райы күрт суытады. Түнгі уақытта ауа температурасы 2 градус аязға дейін төмендеуі мүмкін.