Марқакөл ауданының прокуратурасы «Дипломмен – ауылға!» бағдарламасы аясындағы келісімшарттардың қалай орындалып жатқанын тексерді. Кейбір мемлекеттік қолдау алушылар өз міндеттемелерін орындамаған. Анықталған фактілер бойынша жалпы сома 10,6 млн теңгені құрады.
Солардың бірі медициналық колледжді бітіріп, аудандық ауруханаға жұмысқа келген мейіргерге қатысты. 2023 жылы Күршім ауданы әкімінің қаулысымен оған 5 млн теңге бюджеттік кредит беріліп, 345 мың теңге көтерме жәрдемақы төленген. Марқакөл ауданы 2024 жылға дейін Күршім ауданының құрамында болған.
Келісімшарт бойынша маман ауылдық елді мекенде кемінде үш жыл жұмыс істеуге тиіс еді. Прокуратура оның бұл міндеттемені орындамағанын анықтады.
Прокуратура қабылдаған шаралардан кейін мемлекет кірісіне 2,95 млн теңге қайтарылды. Қалған соманы өндіріп алу бақылауда. Бюджет қаражатының заңды әрі мақсатты пайдаланылғанын тексеру жалғасып жатыр.