Шығыс Қазақстан облыстық мәслихатының XXVI сессиясында облыс әкімі Нұрымбет Сақтағанов сыбайлас жемқорлықпен күресті күшейту және құқықтық тәртіпті нығайту қажеттігі туралы қатаң әрі нақты мәлімдеме жасады.
Қоғамда кез келген құқықбұзушылыққа мүлдем төзбеушілік қалыптастыру қажет, ал «Заң мен тәртіп» тұжырымдамасы жергілікті деңгейде жүзеге асырылуы тиіс. Әкімнің айтуынша, қауіпсіздік, халықтың сенімі және мемлекеттік жұмыстың тиімділігі әрбір басшы мен мемлекеттік қызметшінің заң аясында әрекет етуге дайындығына тікелей байланысты.
Өңір басшысы ешбір құқықбұзушылық ескерусіз қалмайтынын атап өтті.
«Әріптестерімді тағы да ескертемін: кез келген дерек пен ақпарат тексеріліп, материалдар тиісті органдарға жолданады», — деді Нұрымбет Сақтағанов.
Еске сала кетейік, кеше анықталған заңбұзушылықтар үшін облыстық жолаушылар көлігі және автомобиль жолдары басқармасының басшысы қызметінен босатылған еді. Нұрымбет Сақтағанов барлық деңгейдегі басшыларды кәсіби этика мен заң талаптарын қатаң сақтауға шақырып, заң мен тәртіп – жай сөз емес, өмір салты екенін ерекше атап өтті.