Шығыс Қазақстанда полиция қызметкерлері көлік жолдарын күзгі тексеруден өткізуді жалғастырып жатыр.
Облыстық ПД Әкімшілік полиция басқармасы «ҚазАвтоЖол» ұлттық компаниясы мен Жол активтері сапасының ұлттық орталығы өкілдерімен бірлесіп, өңірдегі жол жағдайын тексеруде. Соның барысында жол белгілері мен жол таңбаларының жарық қайтарғыш қасиеті, қоршаулардағы жарық шағылыстырғыш катафоттардың болуы және жарамдылығы, қолданыстағы заңнамаға сәйкес жол қозғалысын реттеу техникалық құралдарының дұрыс орнатылуы тексеріліп жатыр.
— Осы күнге дейін жол белгілерінің көрінуіне және жол жамылғысының сапасына әсер ететін 120-дан астам ақау анықталды. Сонымен қатар жол иелеріне 80-ге жуық нұсқама беріліп, жол ұйымдарының 8 басшысы жауапқа тартылды, — деп хабарлады департаменттің баспасөз қызметінен.
Полицейлер 40-тан астам апаттық-қауіпті учаскені ретке келтіру бойынша ұсыныстар дайындап, жол ұйымдарының инженерлік-техникалық құрамымен полицияның қызметтік бөлімшелерінің өзара іс-қимыл мәселелерін пысықтады