Қазіргі таңда Зайсан ауданында 10 елді мекен, соның ішінде Зайсан қаласы да бар орталықтандырылған газбен қамтылған. Бұл аудан халқының 66 пайызын, яғни 23,6 мыңға жуық адамды қамтиды. Соңғы тоғыз жыл ішінде осы бағыттағы жобаларға 4,3 миллиард теңгеден астам қаржы құйылған.
Облыс әкімімен өткен кездесу барысында жергілікті тұрғындар Дайыр, Көкжыра, Қуаныш, Біржан, Сарытерек, Жарсу, Бақасу және Саржыра ауылдарын газдандыру мәселесін қайта көтерді. Аталған жобаны іске асыру нәтижесінде газбен қамту деңгейі 84 пайызға жетіп, тағы 6,3 мың адам көгілдір отынға қол жеткізер еді.
Өңір әкімдігі өкілдерінің айтуынша, жұмысты жалғастыру үшін баламалы газ көзі анықталуы қажет. Бұл мәселе қазіргі таңда ҚР Энергетика министрлігінің қарауына жіберілген.
