Ақарал ауылының халқы қаптап кеткен шегірткенің малға шөп қалдырмай, шабындық пен жайылымдық жерді құртып жатқанын жеткізді.
— Аудандағы басқа ауылдарға мамандар барып химиялық өңдеу жұмыстарын жүргізіп кеткен. Сол кезде «бізге неге келмеді?» деп сұрастырып едік, «ауылдағы халық саны аз» деп жауап беріпті. Бұл малмен күн көріп отырған ақаралдықтарға қиын болды. Егер шегірткені тоқтатуға көмек болмаса, қыста мал аштан қырылайын деп тұр!, — дейді тұрғындар.
Осы мәселені Зайсан ауданының әкімдігі бақылауға алды.
— Ақарал ауылы аумағында шегірткелердің қаптауы аудан әкімдігі тарапынан назарға алынып, тиісті жұмыстар қолға алынды. Сол жерге ауыл шаруашылығы бөлімінің мамандары барып, нақты ахуал зерделенді. Қазіргі уақытта Зайсан ауданында аса қауіпті зиянкестерге қарсы химиялық өңдеу жұмыстары облыстық бюджет есебінен кезең-кезеңімен жүргізіліп жатыр. Бүгінге дейін Зайсан қаласы, Кеңсай және Қарабұлақ ауылдық округтерінде авиациялық әдіспен өңдеу жұмыстары атқарылған, — деп жауап берді әкімдіктен.
Қаратал ауылдық округінде ауа райының қолайсыздығына байланысты жұмыстар уақытша тоқтап тұр.
— Алдағы күндері Біржан, Сарытерек, Айнабұлақ және Дайыр ауылдық округтерінде химиялық өңдеу жалғасады. Жерүсті бүрку техникасы келгеннен кейін Ақарал аумағы да қамтылады, — дейді әкімдік өкілдері.