17 сәуір күні таңғы уақытта Өскемен қаласы Полиция басқармасына тұрғын үйдің 9-қабатындағы балконнан секірмек болған жас жігіт жөнінде хабар түскен.
— Аталған мекенжайға дереу Өскемен қаласы ПБ патрульдік полиция батальонының қызметкерлері Қайрат Ташкенбаев пен Ерасыл Мұратханов келді. Бір инспектор көше деңгейінде қауіпсіздік шараларын ұйымдастырса, екіншісі жоғарғы қабатқа көтеріліп, балконның сырт жағында тұрған азаматпен тілдесуге кіріскен, — деп хабарлады ШҚО ПД баспасөз қызметінен.
Полиция қызметкерінің айтуынша, 25 жастағы азамат ауыр психоэмоционалдық жағдайда болған. Әңгімелесу барысында инспектор оның сенміне кіріп, есірткіге тәуелділігі бар екенін және жалғыздық сезімі мазалайтынын анықтаған. Тәртіп сақшысы азаматқа өмірдің құндылығы, қиындықтарды жеңу жолдары және жаңа бетбұрыс жасау мүмкіндіктері туралы айтқан.
Сөйтіп, азамат өз еркімен балконның қауіпсіз жағына өтіп, кейіннен жедел жәрдем қызметкерлеріне тапсырылды.