Облыстық ТЖД өкілдері көлікте не үшін өрт шығатынын түсіндіріп берді. Жыл басынан бері облыста 28 автокөлік өртенген.
Автокөлік — техникалық тұрғыдан күрделі құрылғы болғандықтан, от бірнеше минут ішінде жан-жаққа тарап кетеді. Көбіне көліктегі өрттердің 90%-ы электр жабдығы салдарынан болады.
— Электр сымдарының қысқа тұйықталуынан, түрлі сұйықтықтар және басқа да факторлар әсерінен жалын шығады. Көлікте қосымша электр жабдығын орнату, мысалы, дөңгелектердің дискілерін немесе көлік корпусының үстін арнайы жарықтандыру, әртүрлі антирадарлар және тағы басқа да құрылғылар — бұл да көлікте өрт шығуына себеп болуы мүмкін, — дейді ШҚО ТЖД бастығының орынбасары Амангелді Еңсегенов.
Осы ретте, өрт сөндірушілер жүргізушілерге үнемі көліктерінің техникалық жағдайын тексеріп отыруға кеңес берді.
