Айыпталушыларға қатысты іс алаяқтық, салық төлеуден жалтару және ақшаны жылыстату баптары бойынша қаралды. Үш сотталушы — Елена Кузьмина, Игорь Потапов және Ержан Мандиев алаяқтық бабы бойынша ақталды. Алайда Мандиев жекеменшік иесіне мүліктік зиян келтіргені үшін кінәлі деп танылып, екі жыл сегіз айға бас бостандығынан айырылды.
Алаяқтық пен салық заңын бұзды деп айыпталған Галина Мокина толықтай ақталып шықты. Қалған айыпталушылар — Александр Толстяков, Андрей Рябец, Константин Лобанов және Дмитрий Борзых 2 жарым жылдан 2 жыл 8 айға дейін бас бостандығынан айырылды. Сот барлық сотталушыны 2021 жылдан бастап тергеу изоляторында және үйқамақта болған уақытын есептеп, түрмеден босатты.
Айта кетейік, автокөліктерді құрастыру және сатумен айналысқан «Бипек-Авто – Азия Авто» компаниясы Қазақстан нарығында 1992 жылдан бері жұмыс істеп келді. 2020 жылы ел билігі Өскеменде толық циклді зауыт салу бойынша міндеттемелердің орындалмауына байланысты холдингпен келісімшартты бұзды. Сот шешімімен компания мемлекетке 174 млрд теңгені қайтаруға міндеттелді.