Осыған дейін облыстың Абай ауданында ата-аналар құжат тапсыру үшін Семейге 200 шақырым жол жүруге мәжбүр болған. Ал заң бойынша бұл құжаттар мүлде талап етілмеген де.
Ауданда ерекше білім беруді қажет ететін 10 бала сабақты үйден оқып жатыр. Заңға сәйкес, ол үшін дәрігерлік-консультациялық комиссияның қорытындысы жеткілікті. Бірақ мектептер қосымша психологиялық-медициналық-педагогикалық консультацияның анықтамаларын талап еткен.
— Әр сапар отбасы үшін ауыр сынақ. Себебі мүгедектігі бар баламен қалаға жету оңай шаруа емес. Көлік жалдауға, жатын орынға ақша кетеді. Енді осы мәселенің шешілгеніне ризамыз, — дейді ата-аналардың бірі.
Прокуратура араласқаннан кейін талаптар заңсыз деп танылды. Осыдан былай ата-аналар артық құжаттарды сабылып тасымай-ақ балаларын үйде оқыта алады.
— Тексеру жүргізіп, жағдайды анықтаған соң, ұсыныс енгіздік. Сөйтіп, мәселе шешілді. Біздің міндетіміз — азаматтар тап болатын кедергілерді жойып отыру, — деп хабарлады Абай облысы прокуратурасынан.