ҚР ҰҚК Шығыс Қазақстан облысы бойынша департаменті Өскемен қаласының екі тұрғынына қатысты ҚР ҚК 172-бабы («Шетелдік қарулы қақтығыстарға қатысу») бойынша сотқа дейінгі тергеуді аяқтады.
— Аталған азаматтар 2024 жылы Ресейге шығып, Украина аумағындағы шетелдік қарулы қақтығысқа қатысып, Донецк облысында ауыр жарақат алып, қаза болған. Олардың денелері Өскеменге жеткізілді. Сараптама қорытындысына сәйкес, өлімнің себебі – «жарылыстар мен жарықшақтардан болған зақымданулар салдарынан жедел массивті қан жоғалту», – деп хабарлады департаменттен.
Өскемен қаласының №2 сотының қаулысымен ҚР ҚПК 35-бабы 1-бөлігі 11-тармағына сәйкес айыпталушылардың қайтыс болуына байланысты қылмыстық іс тоқтатылды.