Өңір аумағында 1-28 ақпан аралығында республикалық «Браконьер» жедел алдын алу шарасы өтіп жатыр. Ондағы мақсат – биоресурстарды заңсыз пайдалануға қарсы күрес, экологиялық құқық бұзушылықтардың жолын кесу және табиғат қорғау заңнамасының сақталуын бақылау.
— Шара басталғалы 110-нан астам құқық бұзушылық анықталып, заңсыз аң және балық аулау фактілері бойынша екі сотқа дейінгі тергеу басталды. 72 адам аң аулау қағидаларын сақтамағаны үшін, 34 азамат балық аулау заңнамасын бұзғаны үшін әкімшілік жауапкершілікке тартылды, — деп хабарлады ШҚО Полиция департаментінен.
Мысалы, Марқакөл ауданында полиция қызметкерлері Өскемен қаласының тұрғыны тізгіндеген Skoda Octavia көлігін тоқтатқан. Көліктің жүксалғышынан қажетті құжаттарсыз тасымалданған 50 келі «көксерке» балығы табылған. Ер адам балықты бейтаныс адамдардан сатып алғанын айтқан. Заң бұзушыға қатысты әкімшілік материал толтырылып, әрі қарай тексеру үшін Күршім ауданының балық инспекциясына жолданды.
