Егер азаматтар денсаулығына байланысты халыққа қызмет көрсету орталығындағы белгілі бір қызметті ала алмаса, оның өзі немесе жақыны ХҚО қызметкерін үйге шақырта алады.
Бұл қызметті ағзасының функцияларының тұрақты бұзылуы салдарынан өмір сүру қабілеті шектелген азаматтар, 1 және 2 топтағы мүгедектігі бар жандар мен Ұлы Отан соғысының ардагерлері пайдалана алады.
— Бұл мемлекеттік қызметтерді барлық азаматтарға теңдей қолжетімді етуге мүмкіндік береді, — дейді мемлекеттік корпорация өкілдері.
ХҚО қызметкерін үйге шақырту үшін қызмет алушы немесе оның қамқоршысы 1414 байланыс орталығына қоңырау шалып, өтініш қалдыруы керек. Бұдан кейін
ХҚО қызметкерлері өтініш берушімен байланысып, қажетті құжаттардың бар-жоғын нақтылайды. Содан соң мемлекеттік қызметті көрсету үшін үйге қай күні, қай уақытта баратыны белгіленеді. Өтініш қабылданған сәттен бастап ХҚО операторлары клиентпен жеті жұмыс күні ішінде кері байланысқа шығуы керек.
Айта кетейік, ең жиі сұралатын мемлекеттік қызметтер қатарына паспорт пен жеке куәлік беру, ЭЦҚ рәсімдеу, зейнетақы мен жәрдемақы тағайындау жатады.