Алматы қаласындағы қонақүй бірнеше күн қонып алып ақысын төлемеген өскемендікті сотқа беріп, жеңіп шықты
ШҚО соты баспасөз қызметінің мәліметіне сүйенсек, өткен жылдың шілде айында «Booking» жүйесі арқылы беймәлім Германия азаматы Алматыдағы қонақүйде 2024 жылдың 30 шілдесі мен 8 тамызы аралығында тұруға бронь жасаған. Ақша сол адамның картасынан төленген.
Қонақүйге шынымен де бір адам келіп, осы күндері тұрды. Бірақ 2024 жылдың 14 қазанында банк картасының иесі транзакция алаяқтарға жасалды деп көрсетіп, қонақ үйдің шотына түскен соманы қайтарып алған.
— Қонақүй әкімшілігі бұл адамның Өскемен тұрғыны екенін анықтап, одан 429 300 теңге өндіру туралы сотқа талап арыз түсірді. Сот барысында жауапкер қонақүйде тұрғанын мойындамай, сол уақытта Өскеменде болғанын алға тартты. Алайда сотта ұсынылған дәлелдемелер оның қонақүйде болғанын растады. Айғақтарды көргенде жауапкер кінәсін мойындап, істі медиация тәртібімен аяқтауды ұсынды, — делінген ақпаратта.
Осылайша, жауапкер қонақүйдің ақшасын бөліп төлейтін болды.