Қалалық №2 сотта қызметтік міндеттерін атқару кезінде билік өкілін көпшілік алдында балағаттады деп айыпталған қала тұрғынына қатысты қылмыстық істі қарады. Бұл туралы соттың баспасөз қызметінен хабарлады.
Осы жылдың қыркүйек айында полиция капитаны ер адамды ұрлық фактісінің мән-жайын анықтау үшін полиция бөліміне баруды ұсынған кезде оның әйелі шу шығарған. Мас күйдегі әйел тәртіп сақшысын балағаттай жөнелді. Оның кінәсі бейнежазбамен, жәбірленушінің айғақтарымен және тергеу хаттамаларымен расталды.
Сот барысында әйел адам өз кінәсін мойындап, бұл ісіне өкінетіндігін жеткізді. Алайда айыпталушының мас күйде болуы жазаны ауырлататын мән-жай деп танылды.
Сот шешімімен әйел 80 сағаттық қоғамдық жұмысқа тартылды. Үкім әлі заңды күшіне енген жоқ.
