Шығыс Қазақстан облысында полицейлер үш күннің ішінде мас күйде көлік жүргізген 24 адамды анықтаған. Кейбіреулері өз кінәсін мойындаса, жауапкершіліктен жалтаруға тырысқандар да болды.
— Барлық мас жүргізуші әкімшілік жауапкершілікке тартылды. Оларды жүргізуші куәлігінен 7 жылға дейін айыру, 15 тәулікке дейінгі мерзімге әкімшілік қамауға алу жазасы күтіп тұр, — деп хабарлады ШҚО Полиция департаментінен.
Тексерілген жүргізушілер арасында 3 адам бұрын да осындай құқық бұзушылықтар жасаған. Енді олар қылмыстық жауапкершілікке тартылады. Ең ауыр жаза — 5 жылға дейін бас бостандығынан айыру.
Айта кетейік, жыл басынан бері облыста тәртіп сақшылары мас күйде көлік жүргізген 1000-нан астам жүргізушіні тоқтатқан.