Бұл туралы бүгін облыс әкімдігінде өткен отырыста ШҚО Жұмыспен қамту және әлеуметтік бағдарламаларды үйлестіру басқармасының басшысы Альмира Мусинова мәлім етті.
— Осы жылдың тоғыз айында өңір бойынша 1690 отбасы немесе 8066 адам 670,1 млн теңге мөлшерінде атаулы әлеуметтік көмек алды. Өткен жылдың сәйкес кезеңімен салыстырғанда АӘК алушылар саны 3317 адамға немесе 29%-ға азайып отыр. Бұл кешенді қолдау шараларының нәтижесі, — деді ол.
Көмек алатындар саны әсіресе Алтай, Самар және Марқакөл аудандарында азайған.
— Жұмыспен қамтуға жәрдемдесудің белсенді шараларына тартылған АӘК алушылар саны 76,8%-ды (жоспар — 75,4%) құрады. Десе де Өскемен қаласы, Күршім, Шемонаиха, Ұлан, Глубокое, Зайсан және Тарбағатай аудандарында бұл жоспар орындалған жоқ, — деді Альмира Мусинова.
Айта кетейік, 2024 жылы АӘК төлеуге барлығы бір миллиард теңге қарастырылған.
