Өскемен қаласындағы жаңа жолайрыққа «Мерген» аппараттық-бағдарламалық кешенін орнату жұмыстары аяқталды. Әзірге камералар ЖМК шағынауданына қарай бағытталған учаскедегі жол қозғалысын бақылап, құқық бұзушылықтарды тіркейді.
Осындай кешенді қаланың орталық бөлігіне, Ертіс көпірі бағытына да орнату жоспарланып отыр.
ШҚО Полиция департаментінің мәліметінше, жабдықтар жол қозғалысы қауіпсіздігін арттыру және жылдамдық режимінің сақталуын бақылау мақсатында орнатылған.
— Құрылыс жұмыстары әлі де жалғасып жатқандықтан, жолайрықтағы рұқсат етілген ең жоғары жылдамдық сағатына 40 шақырым болып белгіленген, — деп хабарлады ведомство өкілдері.
Қазіргі уақытта ЖМК бағытына қарай жолайрықтың оң жақ бөлігі көлік қозғалысы үшін жабық. Монтаж жұмыстары толық аяқталғаннан кейін бұл учаске ашылады. Одан соң қалаға қарай бағытталған жолайрықтың сол жақ бөлігі 14 күнге жабылады.

