Шығыс Қазақстан облысында тәртіп сақшылары «Нелегал-2026» жедел алдын алу шарасын жалғастырып жатыр. Соның аясында көші-қон қызметкерлері шетел азаматтары мен жұмыс берушілердің заңнама талаптарын сақтауын, оның ішінде ел аумағында болу және еңбек қызметін жүзеге асыру заңдылығын тексеруде.
— Тексерулердің бірінде көршілес мемлекеттің 7 азаматының уәкілетті органның рұқсатынсыз жұмыс істегені және Қазақстан Республикасында уақытша болуға құқық беретін құжаттары болмағаны анықталды. Көші-қон заңнамасын қайталап бұзғаны үшін шетелдіктер ҚР аумағынан шығарылды. Оларға Қазақстанға бес жыл мерзімге кіруге тыйым салынды, — деп хабарлады ШҚО Полиция департаментінен.
Шетел азаматтарының еңбегін пайдалану кезінде заңнама талаптарын бұзған жұмыс беруші де әкімшілік жауапкершілікке тартылды.