Ертең, 27 қыркүйекте, Шығыс Қазақстан облысының әкімі Нұрымбет Сақтағанов бастаған делегация Павлодарда өтетін 2-ші «Ертіс: достық өзені – даму өзені» халықаралық форумына қатысады. Кездесудің негізгі тақырыптары – шекара маңындағы ынтымақтастық, Ертістің көлік әлеуеті және экология.
Форумға Қазақстан мен Ресей делегациялары, мемлекеттік органдардың, бизнестің, қоғамдық ұйымдар мен сарапшылар қауымдастығының өкілдері жиналады. Пленарлық отырыстан кейін «Ертіс: су жолынан заманауи көлік дәлізіне дейін» және «Креативті индустрия – шекара маңындағы аумақтарды дамытудың қозғаушы күші» тақырыптарында екі сессия өтеді.
Бағдарламада Павлодар облысының жетістіктері мен мүмкіндіктеріне арналған көрме, B2B келіссөздер, Ертіске бекіре тұқымдас балықтарды жіберу жөніндегі экологиялық акция және Павлодар өзен портының жұмысымен танысу да бар. Қатысушылар шекара маңындағы аумақтарға арналған бірлескен бастамаларды талқылап, іскерлік байланыс орната алады.