Өңірдегі қар көшкіні қаупі жоғары учаскелерді және гидрологиялық жағдайды зерттеу мақсатында әуеден аэровизуалды мониторинг жасауға ҚР ТЖМ «Қазавиақұтқару» АҚ тікұшағы тартылды.
— Тікұшақта облыстық Төтенше жағдайлар департаментінің, «Қазселденқорғау» ШҚ филиалының, Су ресурстарын қорғау және пайдалануды реттеу жөніндегі Ертіс бассейндік су инспекциясының, «Қазгидромет» РМК-ның мамандары болды. Барлау «Өскемен-Алтай ауданы-Үлкен Нарын ауданы-Катонқарағай ауданы-Өскемен» бағыты арқылы жүргізілді, — деп хабарлады облыстық ТЖД баспасөз қызметінен.
Зерттелген аумақты толығымен қар жауып тұр. Қар жамылғысының құрылымы тұрақты, жоталар мен беткейлерде қарды шамалы жел үрлеп тұрғаны байқалады.
Таулы жерлерде қар көшкіні жүрген жоқ. Бұқтырма өзенін мұз жапқан. Аздап шеті ерігені және ортасында ойықтар байқалады.
Жалпы облыстағы гидрологиялық жағдай тұрақты.