Техникалық диагностика көпірдің нақты жай-күйін анықтап, алдағы күрделі жөндеу жұмыстарын жоспарлауға негіз болмақ.
Дайындық кезеңінде мамандар жобалаушылармен бірлесіп көпірдің іргетасын қарап шықты. Алдағы уақытта тіректер мен көтергіш құрылымдардан бастап жол жабынына дейін барлық элементтер жан-жақты тексеріледі. Бұл атқарылатын жұмыстардың нақты көлемін, кезеңдерін және техникалық шешімдерін айқындауға мүмкіндік береді.
Қала әкімі Алмат Ақышовтың айтуынша, кешенді тәсіл жөндеу жұмыстарының жүйелі жүргізілуі мен көпірдің қауіпсіз әрі ұзақ мерзімді пайдаланылуын қамтамасыз ету үшін қажет.
— Тексеру көпірдің техникалық жағдайы туралы толық мәлімет беріп, конструкцияның тозуы мен нақты жүктемелерді ескере отырып, жөндеу жұмыстарын дәл жоспарлауға мүмкіндік береді, — деді ол.
Айта кетейік, осы Ертіс көпірінде үнемі таңертең және кешке ұзын-сонар көлік кептілісі болады. Себебі халық көп тұратын Жібек маталар комбинаты ықшамауданына апарар негізгі жол осы.