Осы аптаның басында Шығыс Қазақстанда күндіз ауа температурасы нөлден сәл жоғары болса, аптаның ортасына қарай қатты аяз басталады.
Ел аумағына суық антициклон жылжып келеді. Ол тез қозғала отырып, ауа температурасының айтарлықтай төмендеуіне себеп болмақ.
— 14 қаңтарда солтүстік өңірлерде, 15 қаңтарда шығыс аймақтарда түнгі уақытта ауа температурасы -32…-38 градусқа дейін төмендейді. Қатты аязға қарамастан, антициклонның жылдам жылжуы желдің күшеюіне де ықпал етеді. Кейбір аудандарда желдің екпіні секундына 28 метрге дейін жетуі мүмкін, — деп хабарлады «Қазгидромет» РМК.
Өскемен қаласында 12-14 қаңтар аралығында сілбі қар жауып, бұрқасын болады деп күтіледі. Күндіз ауа температурасы 0…+1 градус шамасында болады. Ал 14 қаңтардан бастап күн ашық болады. Күндіз -26…-29 градус, түнде -34…-37 градусқа дейін суытады.