Шығыс Қазақстанда тұмау мен жедел респираторлық вирустық инфекция жұқтырғандар саны күрт өсіп кеткен. Бұл туралы ШҚО Санитарлық-эпидемиологиялық бақылау департаменті басшысының орынбасары Сауле Слямғазина ШҚО Өңірлік коммуникациялар қызметінде өткен баспасөз конференциясында мәлімдеді.
Осы жылдың тоғыз айында өңірде 200 863 адам ЖРВИ-ге шалдыққан. Бұл өткен жылғы көрсеткішпен салыстырғанда 1,74 есе көп. Сонымен қатар тұмаудың зертханалық расталған 228 жағдайы тіркелді. Былтыр 43 адам ғана тұмау жұқтырған еді. Яғни биыл ауырғандар саны 5,6 есе артты.
— Сырқаттану деңгейі көпжылдық бақылаулар көрсеткіштерінен аспайды. Алайда біз облыс тұрғындарына уақытылы вакцина алып, аурудың алдын алуға кеңес береміз, — деді Сауле Слямгазина.
2024-2025 жылдардағы эпидемиялық маусымға дайындық аясында өңірге тұмауға қарсы 75 мың доза вакцина жеткізілді.
— Вакцина қазір халыққа қолжетімді. Медицина қызметкерлерін, жүкті әйелдер мен қарттарды, диспансерлік есептегі балалар мен ересектерді және басқа да тәуекел тобындағы адамдарды вакцинациялауға ерекше назар аударылады, — деді ШҚО Санитарлық-эпидемиологиялық бақылау департаменті басшысының орынбасары.