Шығыс Қазақстан облысында дүкенге жарнамалық ролик түсірген Haval Jolion жүргізушісі мен жолаушысы әкімшілік жауапкершілікке тартылды. Әсерлі кадр үшін жолаушы көлік жүріп келе жатқанда люктен сыртқа шыққан.
Ролик назар аудартты. Полицияның да назарын. Видео әлеуметтік желіге жарияланғаннан кейін ШҚО полиция қызметкерлері жол ережесінің бұзылғанын байқап, түсірілімге қатысқандарды жедел анықтады.
Жүргізушіге жолаушыларды тасымалдау ережесін бұзғаны үшін ҚР Әкімшілік құқық бұзушылық туралы кодексінің 593-бабының 1-2-бөлігі бойынша хаттама толтырылды. Бұл норма көлік жүріп келе жатқанда жолаушының люктен сыртқа шығуына жол бергені үшін де жауапкершілік көздейді.
Жолаушы да әкімшілік жауапкершілікке тартылды. Оған Жол жүрісі қағидаларының талаптарын бұзғаны үшін аталған кодекстің 615-бабының 5-бөлігі бойынша хаттама толтырылды.
Полиция мұндай әрекет қауіпсіздікке қатер төндіріп, ауыр зардапқа әкелуі мүмкін екенін еске салды. Вирусқа айналатын ролик түсіремін деген ниет жол ережесін сақтаудан босатпайды.