Облыстық Төтенше жағдайлар департаменті баспасөз мәліметіне сүйенсек, Өскемендегі Космическая көшесінде 2013 жылы шығарылған автокөлік өртенді. От көліктің қозғалтқыш бөлігінен шыққан. Оқиға орнына шұғыл келіп жеткен өрт сөндірушілер жалынды ауыздықтады.
— Жыл басынан бері облыс бойынша 10 көлік өртенді. Мәселен, Островский көшесінде тұрған 1998 жылғы автокөліктің қозғалтқыш бөлігінде өрт шыққан. Ал Сәтбаев даңғылында 2002 жылы шығарылған Skoda маркалы автокөліктің қозғалтқыш бөлігіндегі бөлшектер мен аспаптар панелі жанған. Сонымен қатар оның қасында тұрған Lada Priora автокөлігінің бампері зақымданған, — делінген ақпаратта.
Согринская көшесінде жеке тұрғын үй аумағындағы гаражда тұрған 2015 жылғы Geely маркалы автокөлік өртенді. Өрт салдарынан резеңке қайық пен ағаш материалдар да жанып кеткен.
Ал «Заря» бау-бақша серіктестігінің аумағында шатыр мен оның астында тұрған Mazda маркалы автокөлік отқа оранды.
Осы ретте, құтқарушылар көлік жүргізушілеріне өрт қауіпсіздігі ережелерін қатаң сақтап, көлікті жиі тексертіп тұру қажеттігін ескертті.