Абай облысында жоғалып кеткен 8 жасар бала құдықтан табылды

Абай облысы Чекоман шағын ауылында із-түзсіз жоғалған бала құдықтан табылды.
8 жасар баланың жоғалғаны туралы хабар түсе салысымен полицейлер, жергілікті атқарушы орган өкілдері мен тұрғындар іздеуге шықты.
— Учаскелік полиция инспекторы Алмас Бесенбеков пен ауылдық округ әкімі Нұркен Жарликенов бейнебақылау камераларының жазбаларын қарап, баланың жүріп өткен бағытын және нақты орналасқан жерін анықтады. Осылайша, бала бірнеше сағат болған құдықтан табылды, — деп хабарлады облыстық Полиция департаментінен.
Алдын ала мәлімет бойынша, бала құдыққа абайсызда құлап түскен. Бетон плитаның бір бөлігі сынып, ойық пайда болып, бала соған түсіп кеткен.
Осылайша, бала аман-есен құтқарылып, оған медициналық көмек қажет болмады. Баланың анасы іздеуге қатысқан барлық адамға және көмек көрсеткендерге алғысын білдірді.