Шығыс Қазақстан облысы Полиция департаменті жаңа жыл мерекелері қарсаңында демалыс күндерінің тыныш әрі қауіпсіз өтуі үшін қауіпсіздік шараларын сақтаудың маңыздылығын еске салды.
Жол қозғалысы қағидаларын сақтау
Мерекелік іс-шаралар кезінде жол қозғалысының қарқыны артады. Жаяу жүргіншілерге жолды тек белгіленген жерлерден және бағдаршамның рұқсат етілген түсінен ғана өтуін сұраймыз. Жүргізушілер аса мұқият болып, жылдамдық режимін қатаң сақтауы, көлік құралын мас күйде басқармауы және ауа райы жағдайларын ескеруі қажет.
Пиротехникалық бұйымдарды пайдалану
Тек сертификатталған пиротехникалық бұйымдарды қолданып, өндірушінің нұсқаулығын қатаң сақтау қажет екенін еске саламыз. Тұрғын үйлердің, автокөліктердің, ағаштардың және электр желілерінің маңында отшашулар мен петардаларды атуға тыйым салынады. Пиротехникалық бұйымдарды балаларға беруге және жарамдылық мерзімі өткен өнімдерді пайдалануға қатаң тыйым салынады.
Кәмелетке толмағандардың қауіпсіздігі
Заң талаптарына сәйкес, 18 жасқа толмаған балалар мен жасөспірімдердің түнгі уақытта, яғни сағат 23:00-ден кейін ата-анасының немесе заңды өкілдерінің еріп жүруінсіз көшеде және қоғамдық орындарда жүруіне жол берілмейді. Ата-аналардан балалардың бос уақытын бақылап, олардың қауіпсіздігін қамтамасыз етуді сұраймыз.
Жаңа жыл түніндегі қауіпсіздік
Баршаңызды өрт қауіпсіздігі шараларын сақтауға шақырамыз: жанған шамдарды, гирляндаларды және электр құралдарын қараусыз қалдырмаңыздар. Тек жарамды электр бұйымдарын пайдаланыңыздар. Бұқаралық іс-шаралар кезінде балаларды және жеке заттарыңызды қадағалаңыздар.
Жаңа жыл мерекелері қауіпсіз өтіп, тек жағымды әсер мен қуаныш сыйласын!