Облыс аумағында жол-көлік оқиғаларының алдын алу және жол жүрісі қағидаларын бұзушылықтарды анықтау мақсатында «Қауіпсіз жол» шарасы өткізіліп жатыр.
— Соның аясында өңірдегі апатты-қауіпті жол учаскелеріне ерекше назар аударылуда. Профилактикалық жұмыстың тиімділігін арттыру үшін ұшқышсыз ұшу аппараттары мен «Кибершериф» борттық кешені белсенді түрде қолданылуда. Жыл басынан бері дрондар арқылы 10-ға жуық жол ережесін бұзу фактісі анықталса, оның екеуі «Қауіпсіз жол» шарасы кезінде тіркелген, — деп хабарлады ШҚО ПД баспасөз қызметінен.
Рейд барысында Өскемен-Риддер тасжолының бір бөлігінде дрон арқылы екі жүргізушінің тыйым салынған жерде қарсы жолаққа шығып, қауіпті маневр жасағаны байқалды. Аталған ереже бұзушылықтыHaval және Subaru көліктерінің жүргізушілері жасаған.
— Олардың әрқайсысына қатысты әкімшілік хаттамалар толтырылып, іс материалдары сотқа жолданды. Жүргізушілерді 6 ай мерзімге көлік айдау құқығынан айырылу жазасы күтіп тұр, — делінген хабарламада.