Биыл облыс орталығында Наурыз мейрамын кең көлемде тойлау жоспарланып отыр.
22 наурызда қала тұрғындары мен қонақтары орталық алаңда өтетін мерекелік шараларға қатыса алады. Күндізгі концерттік бағдарлама сағат 11.00-де басталады. Бас сахнада шаһар мен облыстың өнерпаздары, қазақстандық эстрада жұлдыздары өнер көрсетіп, ән-биден шашу шашады.
Сондай-ақ келушілердің спорттық ойындарға, садақ атуға қатысуға мүмкіндігі бар. Орталық алаңда түрлі тақырыптық көрмелер, цирктік бағдарлама, «Үздік киіз үй» және «Бауырсақ кеші» байқаулары өтеді. Бұл күнде мерекелік сауда, сәндік-қолданбалы өнер жәрмеңкесі сынды шаралар да ұйымдастырылады.
Сағат 18:00-ден 21:00-ге дейін қазақстандық эстрада жұлдыздарының қатысуымен кешкі концерт болады. Ұлыстың ұлы күнін тойлату сағат 21:00-де мерекелік отшашумен аяқталады.