Кешелі бері БАҚ-та және әлеуметтік желіде Семейде жаңа туған нәрестенің перзентханада күйіп қалғаны жайлы ақпарат тарады. Соған қатысты Абай облыстық Денсаулық сақтау басқармасынан жауап берді.
— Нәресте 2 наурызда сағат 00.50-де 39 апта 2 күнінде туды. Салмағы — 4150 грамм. 40 минуттан соң ол неонатальды қарқынды терапия бөлімшесіне «Жаңа туған нәрестедегі тыныс алу бұзылыстары» диагнозымен ауыстырылды. 3 наурызда балада тырыспа (судорога) пайда болды, — делінген ақпаратта.
Ведомство дерегінше, жүргізілген зерттеулерде субдуральды және оң жақ қабырғаның миішілік гематомасы анықталған. Екі күннен кейін ота жасалып, гематома алынып тасталған.
— Отадан кейін баланың терісінде жара бар екені анықталған. Ол күйіктен болатын жараға тән емес. Себебі жара ары қарай таралып кетті. 11 наурызда республикалық мамандармен телеконсультация қорытындысы бойынша алдын ала диагноз қойылды: 3 және 4 дәрежелі қарыншаішілік қан кету, жаңа туған нәрестенің фульминантты пурпурасы. Нәресте Астанаға санитарлық авиациямен жөнелтілді. Онда теріні тексеру, диагнозды нақтылау және кейінгі ем тағайындау үшін қосымша тексеру жүргізіледі, — делінген хабарламада.