Жыл басынан бері облыстағы бірнеше аудан жаңа жұмыс кестесіне ауысты. Бұл өзгеріс алғаш болып Катонқарағай ауданында жасалған. Көп ұзамай Марқакөл, Үлкен Нарын, Зайсан, Тарбағатай, Самар, Күршім аудандарында да жұмыс уақыты бір сағатқа шегерілді. Енді осындай жаңашылдық Алтай және Ұлан аудандарында жасалып отыр.
Жаңа ережеге сай, осы аудандардағы мемлекеттік мекемелер мен кәсіпорындар таңғы 08:00-ден кешкі 17:30-ға дейін жұмыс істейді. Түскі үзіліс 12:00-ден 13:30-ға дейін белгіленген. Ал мектептер, балабақшалар мен медициналық мекемелер бұрынғы кесте бойынша жұмысын жалғастыра береді. Өйткені олардың жұмыс уақыты бұрыннан осындай форматта қалыптасқан.
Алтай ауданында бұл өзгерістер тек мемлекеттік құрылымдарды ғана емес, әлеуметтік саланы да қамтыды. Аудан әкімі Ренат Құрмамбаев тұрғындардың бұл өзгерісті толықтай қолдағанын айтты.
— Барлық елді мекенде жұмыс кестесінің өзгеруіне қатысты кездесулер өтті. Халық жұмыс уақытын оңтайландыру бастамасын қолдады. Бұл өзгеріс азаматтар үшін қолайлы жағдай жасауға бағытталған, — деді Ренат Құрмамбаев.
